Добивај вести на Viber
Владата се задолжи со 41,2 милиони евра преку издавање на државни записи, што е за десетина милиони помалку од тоа што планираше. Процентуално, најмногу потфрлија тримесечните записи со девизна клаузула. Државата сакаше да прибере околу 8,2 милиони евра, но собра само 4,7 милиони. Потфрлање има и кај тримесечните записи во денари. Државата бараше 35 милиони евра, но успеа да обезбеди 28 милиони.
Единствено заинтересирани за сите понудени хартии од вредност имаше за 9-месечните записи во денари. Се бараа 8,5 милиони евра и исто толку беа собрани. Тие имаа поголема камата, што во овој случај изнесува 4,75 проценти, за разлика од тримесечните записи кои се позајмуваат со каматна стапка од 4 проценти.
Парите што ги позајми Министерството за финансии веќе денеска ќе бидат искористени за враќање на стари долгови. Достасуваат 48 милиони евра, што значи дека дел ќе треба да бидат обезбедени од тековните приходи во буџетот.