Владимир Пешевски: Сашо Мијалков не го напишал сам писмото

Добивај вести на Viber

Поранешниот вицепремиер Владимир Пешевски, во изјава за Дојче Веле, истакна дека Сашо Мијалков не го напишал сам писмото полно со критики упатено на адреса на Христијан Мицкоски, што беше вчера објавено во јавноста.

Поранешниот директор на УБК по исклучувањето од партијата му напиша на лидерот на ВМРО-ДПМНЕ дека е лажен патриот кој работи против интересите на Македонија.

„Мислам дека при пишувањето на ова писмо на Мијалков му имаат помогнато и други луѓе со свои информации, сугестии и мислења, па јас го гледам како писмо на една поголема група на луѓе кои се нашле засегнати од последните одлуки на ИК и ЦК на ВМРО-ДПМНЕ. Писмото има и сериозна лична димензија, бидејќи Мијалков се повикува самиот на личната комуникација што ја имале со Мицковски подолг период, и тука освен нив двајца, навистина е тешко за кој било од страна да знае што навистина се случувало меѓу нив. Делува дека определени меѓусебни ветувања и очекувања не биле исполнети. Интересно е што Мијалков во писмото отвора дилема за истрагата во предметот 'Талир' за кој СЈО досега нема покренато обвинение, и ќе биде интересно и важно за ВМРО-ДПМНЕ да се види како ќе се одвива овој предмет, кон кого ќе биде насочен, а кон кого нема, кој какви изјави дал во истрагата и слично“, вели Пешевски.

Според поранешниот владин функционер задолжен за економски инвестиции, времето ќе полаже дали некој од актуелното раководство на ВМРО-ДПМНЕ е веќе „амнестиран“ за да биде пасивен во однос на уставните измени и воопшто Договорот од Преспа.

„Следува веројатно прилично тежок период за раководството на ВМРО-ДПМНЕ и за целата партија, и ова писмо само тоа го навестува. Според мене е најважно колку што е можно побрзо да се поправат односите на партијата со меѓународната заедница, да се фати сериозен приклучок и учество во реформските процеси, особено на правосудниот систем, а за партијата најдобро е колку што може вмровските работи да се решаваат внатре, наместо преку медиумите. Ако се погледне наназад, ВМРО-ДПМНЕ имало историја на вакви разидувања, но речиси без исклучок подоцна доаѓало и до некакво помирување. Затоа е важно секој да биде внимателен во реториката, зошто полесно заздравува нешто што е пукнато, од она што е скршено“, сугерира поранешниот вицепремиер.

Пешевски претходно упати писмо до новоизбраното раководство на ВМРО-ДПМНЕ да го прифатат преспанскиот договор и да не и застануваат на Македонија на патот кон ЕУ и НАТО.