Во мирување протестот во прилепскиот Мермерски комбинат

Добивај вести на Viber

 Вработените во рудникот „Сивец“ при Мермерскиот комбинат во Прилеп решија да го стават во мирување протестот и да почекаат деновиве да се сретнат со раководството на комбинатотот, информираат од Основната синдикална организација и од прилепскиот регионален синдикален совет.

Работниците од рудникот вчера престанаа со работа и реагираа на намалувањата во августовските плати по основ на варијабили, успешност, квалитет и норми во работата, што во платата учествува со 30  проценти. Платите во просек, велат од синдикатот, на поголем дел од 220. лица во рудникот била намалена за 10 до 15  проценти.

- Ќе почекаме кон крајот на неделата да го слушнеме ставот на извршните директори, па потоа да се види што ќе се прави, вели Симе Звездакоски, претседател на Основната синдикална организација.

Според Лазар Ангелески, претседател на прилепскиот регионален синдикален совет, Гранковиот синдикат за градежништво, индустрија и проектирање при ССМ, во разговорите со дел од управата во Мермерскиот комбинат во фирмата не се утврдени нормите.

- Иако од Комбинатот велат дека минатиот месец вработените не ги оствариле  зацртаните норми, всушност нормите не се ниту утврдени. Инаку, според податоците во август компанијата  остварила натфрлување на планот, како тогаш не биле остварени зацртаните норми. Во секој случај треба да се разговара со раководството, вели Ангелески.

Во Мермерскиот комбинат има вкупно 350-ина вработени од кои 220 се во рудникот „Сивец“.