Возилото на пратеникот Манојлоски претресено по грабежот на банката во Сарај

Добивај вести на Viber

Возилото на пратеникот од ВМРО-ДПМНЕ, Бранко Манојлоски, било претресувано од страна на полицијата по грабежот на експозитира на НЛБ Банка во Сарај, потврди МВР.

Сепак претресот бил случаен, односно не бил по претходно сознание на полицијата дека автомобилот е во сопственост на пратеникот. Полициски службеници кои го претресле возилото на пратеникот биле поставени на позиција во врска со претходно извршено кривично дело (развојништво во Експозитурата на НЛБ банката во Серај ) и вршени се проверки на возилата на граѓаните,а меѓу нив и на Г.М. , без притоа воопшто да знаат дека станува збор за пратеник, информира МВР. По извршената проверка, на лицето му е дозволено да си оди без никакви проблеми, велат од таму.

Манојлоски денеска ја напушти собраниската седница на комисијата за труд и социјална политика во знак на револт, како што кажа, поради инцидент што му се случил на пат кон Собранието.

Имено, Манојлоски рече дека утрово кога одел на работа кон Собранието на кружниот тек во скопската населба Ѓорче Петров бил запрен од страна на вооружени полицајци кои, како што посочи, и покрај тоа што им кажал дека е пратеник му рекле да излезе со цел да извршат претрес внатре во возилото.

Утрово во експозитурата на НЛБ Банка во Сарај се случи грабеж од страна на вооружена група разбојници. Во моментот на случувањата во експозитурата биле присутни вработени и клиенти, при што сите се безбедни и во добра состојба, информираат од банката.

„Во моментов сѐ уште нема детали за висината на направената штета. Надлежните органи вршат увид на самото место и се во блиска соработка со Банката за што побрзо и ефикасно разрешување на случајот и разоткривање на деталите, за што јавноста ќе биде дополнително известена.

Претставници на Банката се во постојан контакт со клиентите и вработените кои биле присутни во филијалата, ставајќи ја нивната безбедност и нивното здравје во преден план“, се вели во соопштението.

Од таму велат дека украдените средства на клиентите се сигурни бидејќи банката има осигурување на целиот свој имот и пари.