Заев: Владата и УЈП го однесоа „Киро Ќучук“ во стечај

Добивај вести на Viber

Градоначалникот на Струмица Зоран Заев доцна вчера ја обвини Владата и Управата за јавни приходи, дека се главните виновници што фирмата „Киро Ќучук“ од Велес заминува во стечај. „За име на вистината која што ја знаат Велешани, ја знае цела Македонија, уште еднаш ќе повториме. Фирмата „Еленица“ од Струмица е сопственост на Трајче Заев, прв братучед на Зоран Заев, таа е сопственик на 24,8 проценти од акциите во „Киро Ќучук“. Таа сопственост ја има стекнато по пат на берза во 2008 година. Кога ги купи акциите „Еленица“ од Струмица во истиот момент беше попишан целиот имот на „Киро Ќучук“ од страна на Управата за приходи, беше ставено разлачно право и од тој момент Заеви не можат да размислуваат ни на управување, ни на мнозински пакет, ние не можевме да влеземе во дворот на „Киро Ќучук“, 24,8 проценти е малцински пакет“, одговори Заев на обвинувањата од ВМРО-ДПМНЕ. За стечајот на велашката тулана Заев ги обвини Владата и УЈП. „Фабриката бескрупулозно ја носат во стечај. Подносители на стечајот се Владата и УЈП. И целта е една, да пропаднат парите на Заев“. Претходно ВМРО ДПМНЕ обвини дека Заеви ја купиле фабриката за да не работи. „Во повеќе наврати досега прашуваваме дали Киро Ќучук е купена од Заеви токму за да не работи. За да не биде конкуренција на фабриката Еленица, која е во целосна сопственост на Заеви“, посочи советникот од редовите на ВМРО-ДПМНЕ во општина Велес Петре Саздов кој изрази загриженост за неколкуте стотици вработени од фабриката кои останаа без работа.