Заздравуваат рударите повредени во рудникот Добрево

Добивај вести на Viber

Двајцата рудари повредени во несреќата што се случи во рудникот во Злетово во петокот заздравуваат од повредите, соопшти компанијата која управува со рудникот. Едниот од повредените работници истиот ден беше пуштен на домашно лекување, додека другиот се уште е под болничко надгледување. Индо Минерали и Метали Македонија се во постојана комуникација со семејството и со медицинскиот персонал во Клиничката болница во Скопје, со цел следење на состојбата на рударот. „Нашите вработени се нашата најголема инвестиција и токму затоа компанијата останува посветена на грижата за секој еден од нив. Воедно, ги имаме имплементирано сите стандарди и прописи за заштита и ги правиме сите потребни напори во превенирање и намалување на бројот на несреќи при работа“, изјавија од компанијата. Во рудниците со кои стопанисува компанијата, Злетово и Тораница, вкупно се вработени околу 1.000 лица и сите вработени се осигурени на 24 часа. ИММ Македонија има усвоено правилник за работа кој треба да се следи доследно, заради избегнување на несреќи од секаков вид. Дополнително секој од вработени посетува петнаесетдневна обука за безбедност при работа, која што содржи теоретски, но и практичен дел. Според истите стандарди и процедури во случај на несреќа, секој од рудниците има сопствено амбулантно возило со две медицинска лица, како и обучена екипа за спасување. При последната незгода од минатиот петок, по спроведената инспекција, надлежниот рударскиот и полицискиот инспектор, уште истиот ден, одобрија продолжување на работите во рудникот Злетово. Истрагата водена од рударскиот инспекторат е се уште во тек и се работи на откривање на причините за несреќата.

Двајца рудари повредени во експлозија во рудникот „Добрево“