Апелација денеска ја разгледува жалбата, Груевски нема да дојде

Добивај вести на Viber

Поранешниот премиер Никола Груевски синоќа ја продолжи „преписката“ со Апелациониот суд и на Фејсбук, но за денеска е најавено разгледувањето на неговата жалба за која екс-претседателот на ВМРО-ДПМНЕ најави дека нема да присуствува на рочиштетои со своите адвокати.бидејќи „веќе ја знае одлуката“.

Екс премиерот Груевски вчера изјави дека судовите носат одлуки под политички притисок. Жалбата се однесува на двегодишната казна затвор, донесена од Основен суд Скопје 1. Тој е обвинет во случајот на СЈО, „Тенк“, за купување автомобил „Мерцедес“ во вредност од 580 илјади евра. Груевски очекува одлуката на судот да биде казна затвор помалку од една година, за тој да нема право на жалба во Врховен суд.

Тој вчера на прес-конференција во Собранието истакна дека има сознанија дека имало предлог казната да се намали под една година за да нема право на жалба и дека планот бил утредента, на 31 август, да почне и заврши седницата, а веќе следниот петок да се објави пресудата.

„Било укажано дека за истото судијката има добиено инструкции од многу повисока инстанца и барала од секој судија поединечно да ѝ потврди дека ќе гласа согласно со сугестијата, а ако не може да прифати да се повлече и да отстапи на друг кој ќе гласа според политичкото влијание“, рече Груевски и додаде дека ова е дно на сите дна во кое е доведено македонското судство.

Апелација потоа ги демантираше овие „сознанија“ на Груевски, а овој потоа реагираше со статис на Фејсбук дека не сака да ја одолговлекува пресудата.

„Сосема очекувано беше дека судот ќе ги демантира сознанијата изнесени во мојата денешна изјава. А што друго би направил? Но од соопштението – демант на Апелацискиот суд, не само меѓу редови, туку и директно се чита пристрасноста на оној кој го креирал текстот на овој демант и се наѕира веќе донесената одлука за мое прогласување за виновен, иако ниту имам сторено кривично дело, ниту постојат докази за такво нешто, ниту судската постапка во прв степен е соодветна, ниту пак по закон можат да вршат гонење за нешто што има и релативна и апсолутна застареност а во корелација со член 30 од КЗ. Судот си дозволил во одговорот јавно да се пресметува со мене, обвинувајки ме дека со остварувањето на моите права кои се сосема оправдани во правец на барање неколку изземања, всушност дека сум сакал да го одолговлекувам судењето. На пример за изземање на судија за кого е отворена постапка за одговорност веќе има и судска пракса за негово изземање од кога во 2017та истото се случи во Кривичниот суд. Притоа забораваат дека максимумот што го бараше адвокатот на другиот обвинет од името на сите адвокати беше одложување за еден работен ден, со цел наместо во петок, во понеделник да бидат присутни сите адвокати. 

Неможе да стане збор за одолговлекување кога се бара изземање на судии кога се знае дека тоа се решава за еден час, како и што беше направено, или најмногу ден-два доколку се прифатеше барањето за изземање, вклучително и она за кое одлучува врховниот суд. Со ова соопштение-демант, за жал апелацискиот суд само го потврди она што денес го објавив, а наскоро и на дело ќе го покаже тоа кога ќе ја објави одлуката“, напиша на својот фејсбук-профил Груевски. 

Претходно Апелацискиот суд соопшти дека наводите на Груевски се во целост невистинити, исконструирани и тенденциозни со цел да се дискредитира Судот и да создаде лажна перцепција во јавноста дека судството е под притисок на власта и носи нарачани одлуки. Од Судот информираа дека предметот е распределен кај судијата известител согласно АКМИС системот, а Советот постапува според годишниот распоред за работа на судиите донесен од страна на претседателот на Судот, согласно Судскиот деловник.