Британскиот парламент го одобри Брегзит со големо мнозинство

Добивај вести на Viber

Домот на општините или Долниот дом на британскиот парламент го одобри со големо мнозинство - 494 „за“ наспроти 122 „против“ законот за започнување на постапката за излез од Европската унија при финалното гласање на законот за Брегзит. Така законодавниот предлог ќе биде на следно гласање придвижен кон Домот на лордовите (Горниот дом), објави BBC.

Британскиот премиер Тереза ​​Меј веќео г објави 31 март како краен рок до кога ќе ја извести ЕУ за активирање на член 50 од Лисабонскиот договор, но за тоа и е потребно дозвола на парламентот.

Постапката предвидува во Горниот дом да има 3 гласања пред законот да биде конечно одобрен или отфрлен. Пред третото читање можат да се прифатат предлозите за промени. Ако Домот на лордовите одлучи да направи измени во законот, тој ќе биде вратен повторно во Домот на општините.

Иако завршило со категоричен резултат, гласањето не помина без сериозни несогласувања. Некои од пратениците на лабуристите продолжија да се противат на законот, кој го легитимира Брегзит и гласаа против. Други го послушале повикот на лидерот Џереми Корбин и го поддржаа претстојното излегување од ЕУ.

Еден од оние кои се противеа беше членот на владата во сенка Клајв Луис, кој рече дека „не може со чиста совест да поддржи нешто што на крајот ќе му наштети на градот, кој го претставува, го сака и го нарекува свој дом“. Потоа тој поднесе оставка како член на владата во сенка.

Расположението меѓу владејачките функционери беше спротивно. Министерот одговорен за Брегзит - Дејвид Дејвис го поздрави „историското гласање“.

„Сега е време за сите, без разлика како гласале на референдумот, да се обединат за да обезбедат успех на оваа важна задача за нашата земја“, повика Дејвис.

Владата очигледно е цврсто убедена во успехот на законот, а негов член, кој побарал анонимност, дури си дозволи да упати закана кон Домот на лордовите. „Ако лордовите не сакаат да се соочат со огромен јавен повик да бидат отстранети, тие треба да ја заштитат демократијата и да го одобрат овој закон“, предупреди министерот.