Кредиторите ѝ одобрија нов заем на Грција

Добивај вести на Viber

Грција и нејзините кредитори се согласија за нов заем од 86 милијарди евра, изјавија од Министерството за финансии. „Постигнат е договор. Некои мали детали ќе бидат дискутирани сега“, изјави грчкиот министер за финансии, Еуклид Цакалотос, додавајќи и дека „2-3 мали детали сé уште мора да бидат средени“. Преговорите траеја непрекинато во последните 18 часа, додека двете страни се обидуваа да ги надминат пречките и да дојдат до договор. Имало само една мала пауза за време на состанокот. Грција мора да исплати 3,2 милијарди евра до Европската централна банка до 20 август, а понатамошната исплата од 1,5 милијарди евра на ММФ треба да биде извршена во септември. Земјата има потреба од 86 милијарди евра за да одбегне тотален економски колапс. Претходно, грчките власти рекоа дека 18 август е последниот датум на кој мора да се постигне договор. Со истекот на времето, Грција цели да употреби 12 милијарди за исплата на долговите, 10 милијарди за повторно снабдување на грчките банки со капитал и 5,3 милијарди за исплата на државните трошоци, според The Financial Times.