„Ибни Пајко“ засега се спаси од барокна фасада

Добивај вести на Viber

Нема фирма заинтересирана за барокизација на историскиот објект Ибни Пајко а архитектите го бојкотираат проектот за негова „барокна“ фасада.

Ниту еден архитект не се јави на тендерот распишан од страна на Град Скопје а архитектите се одзваа на повикот на ААМ и решија да го бојкотираат проектот за барокизација на познатиот објект „Ибни Пајко“ на плоштадот „Филип Втори“ во центарот на Скопје.

Сепак градските власти најавуваат уште еден повик за тендер и  брзаат да го променат изгледот на препознатливото здание, но од Асоцијацијата на архитекти на Македонија соопштуваат дека ќе го повторат повикот за бојкот.

Граѓаните на главниот град за изработка на проектната документација ќе треба да платат 1.016.949 денари, без вклучен ДДВ.

Дизајнот на маркантното здание „Ибни Пајко“ е изработен од архитект Михо Чакеља. Ова историско здание од старо Скопје е изградено во 1938 година.

Градските власти засега не излегуваат со официјално објаснување за причините поради кои треба да се промени изгледот на објектот. И покрај тоа што минаа неколку месеци од првичните најави на Град Скопје, од Националниот конзерваторски центар нема реакција околу претстојното уништување на изгледот на зградата, која е дел од архитектонското наследство на главниот град.