Листа на должници: Првиот должник ТЕ-ТО нема да и плаќа на УЈП

Добивај вести на Viber

Стои ли гасната централа ТЕ-ТО последен пат како најголем даночен должник на листата која еднаш месечно ја објавува Управата за јавни приходи. Последната е објавена во петокот и на неа ТЕ-ТО е прв најголем должник кон државата на која и должи вкупно 17,2 милиони евра и тоа по основ на данокот на добивка. Сепак на седница на Владата на 22 октомври донесена е одлука на која на ТЕ-ТО му се доделува државна помош и тоа во форма на одложување на плаќањето на данокот кон Управата. УЈП не се произнесе досега, но ТЕ-ТО најверојатно ќе се остане на листата ама за некоа време нема да треба да го плаќа данокот. 

Инаку одлуката предизвика силна реакција во јавноста особено затоа што ТЕ-ТО е фирма која е под сомнение дека предизвикала лажен стечај и под сомнеж за перење пари. Во моментов и Обвинителството за организиран криминал и корупција води истрага за предметот и е пред носење обвинителска одлука.

„Согласно Законот за државна помош Владата донесе одлука за одложување на плаќањето на даночниот долг. Станува збор за единствен објект кој произведува електрична енергија од природен гас, не влијае на загадувањето, допринесува за поголем БДП на државата како и за подобрување на енергетската сигурност. Во интерес на државата е објектот да работи без запирање, изјавија од Владата за Фактор.

Одлуката е донесена на 160 владина седница, а примерок од склучениот Договор меѓу Владата на Република Северна Македонија и Друштво за производство на електрична и топлинска енергија ТЕ-ТО АД Скопје, во рок од 8 дена ќе се достави до Министерство за финансии и Управата за јавни приходи.

Управата за финансиска полиција во јуни година поднесе пријави до директорот, нотар и стечаен судија за случајот ТЕ-ТО за лажен стечај и перење пари. 

Сомнежите се дека станува збор за испрани над седум милијарди денари или над 100 милиони евра. Финансиската полиција потврди дека на ваков начин на Топлификација и е нанесена штета од над 720 милиони денари, а првичните реакции од Топлификација, акционер во ТЕ-ТО, сега се дека Владата е селективна. Тие прашуваат дали е вмешан и функционер во овој случај.  

Во текот на планот за реорганизација по стечајот на ТЕ-ТО, компанијата избриша 150 милиони евра од побарувањата на доверители кои после беа впишани како добивка. 

А.Т.