Македонија и БиХ ќе ја интензивираат економската соработка

Добивај вести на Viber

Постои огромен простор за зголемување на трговската размена меѓу Македонија и БиХ, заклучија на денешната средба во Cкопје министрите за земјоделство на двете земји, македонскиот, Љупчо Димовски и босанскиот, Мирко Шаровиќ. Двајцата министри се договорија, клучни заложби да им бидат интензивирањето на економската соработка преку почеста комуникација меѓу бизнис-заедниците и поедноставувањето на царинските постапки во делот на фито-санитарната политика. - Сметаме дека не е доволно сторено во овој правец. Потребни се дополнителни чекори за унапредување на трговската соработка, за пласман на нашите производи во БиХ и обратно. Ќе организираме бизнис средби во соработка со коморите со цел размена на информации за потенцијалот за пласманот на земјоделско-прехранбените производи и поинтензивен маркетинг преку настап на саеми и други форми на презентација и промоција како начин за унапредување на извозот - посочи министерот Димовски на заедничката прес-конференција. Според него, акцент ќе биде ставен и на размената на искуства за евроинтеграциските процеси во земјоделскиот и руралниот сектор особено во однос на јакнење на административниот капацитет на институциите. Шаровиќ ја нагласи потребата од реализирање на заеднички иницијативи и зголемување на соработката преку ЦЕФТА. - Двете економии, особено земјоделството, не се меѓусебно конкурентни. Напротив, постои многу простор за зголемување на размената, напомена Шаровиќ и најави дека во претстојниот период Македонија и БиХ ќе ги усогласат документите за поедноставна размена на стоки. Воедно, додаде, ќе се работи и на отклонување на царинските бариери.