МАКЕДОНСКА ДРЖАВЈАНКА Е ПРОТЕРАНА ОД СРБИЈА КАКО „БЕЗБЕДНОСНА ЗАКАНА“: МНР бара објаснување од српските власти

Добивај вести на Viber

Во пресметката меѓу Хрватска и Србија, од Србија е протерана и македонска државјанка, a Mинистерството за надворешни работи(МНР) бара објаснување од српските власти. 

Пред два дена Србија протера петмина хрватски државјани, а во групата протерани од Србија е и Искра Росо, македонска државјанка, извршна директорка на здружението на граѓани Солем. Таа учествуваше на едукацијата на Ерсте фондацијата во Белград, а хрватските државјани присутни на оваа едукација, заедно со други учесници, беа протерани од Србија.

Министерството за надворешни работи изрази загриженост поради одлуката на властите во Република Србија да протераат македонски државјанин и да забранат влез во земјата во период од една година. За српските надлежни органи, лицето претставува „безбедносна закана“.

Во официјалната реакција, Министерството најави дека ќе побара објаснување за оправданоста на преземените мерки.

„Очекуваме дека преземените активности се во согласност со законските рамки на Република Србија, како и со европските и меѓународни стандарди за човекови права“, се наведува во соопштението на МНР.

Министерството исто така ја нагласи важноста од решавање на ваквите случаи преку дијалог.

„Искрено очекуваме овој случај да биде разрешен на соодветен начин, со добра волја од двете страни. Ова е од особено значење за задржување на пријателските и добрососедски односи помеѓу Македонија и Србија“, изјавија од Министерството за надворешни работи.

Загреб веќе испрати протестна нота до Белград и им препорача на своите граѓани да ги одложат патувањата во Србија.