На земјиште од 28 милиони евра, наплаќаме закуп од само 120 илјади во слободните индустриски зони

Добивај вести на Viber

Дирекцијата за технолошко-индустриски развојни зони има земјиште кое, барем на хартија, вреди 28 милиони евра, но од тоа минатата година е остварен симболичен приход за закуп од само околу 120 илјади евра.

Ова е констатирано во ревизорскиот извештај за приходите на Дирекцијата остварени во 2023, каде што е прикажано дека е остварен закуп на градежно земјиште од 7.411.000 денари, а при тоа во делот на материјалните средства е заклучено дека парцелите што се во зоните вредат 1,7 милијарди денари.

„Земјиштето во износ од 1.703.825 илјади денари се однесува на градежно земјиште со површина од 7.945.797 метри квадратни кое е во сопственост на РСМ лоцирано во повеќе технолошко-индустриски зони за кои работите во врска со основањето, управувањето и развојот на зоните ги врши Дирекцијата врз основа на Одлуки на Владата. Дел од наведеното земјиште со површина од 1.588.057 метри квадратни било дадено под долгорочен закуп на корисниците на технолошките индустриски развојни зони, додека остатокот вклучува корисна површина што е во функција на закупениот имот, како и слободни парцели наменети за издавање на корисниците во ТИРЗ“, објаснуваат ревизорите.

Инаку во слободните индустриски зони во Скопје 1, Скопје2, Прилеп, Штип, Струмица, Кичево, Струга, Тетово итн, минатата година работеле околу 35 фабрики, главно на странски инвеститори и претежно од автомобилската индустрија.

Наплатата на симболичната сума е регулирана преку договори со компаниите кои имаат свои фабрики во некоја од активните индустриски зони. Според тоа, сумата од околу 120 илјади евра за долгогодишното отстапување на пространите парцели може да се каже дека е очекувана, поради повластените цени.

Другите услуги се наплатени објективно, барем од голо око, па така од обезбедување на гас Дирекцијата од фабриките има приход од 3,85 милиони евра, а од одржување на инфраструктурата и евиденцијата за влез и излез на стоки се добиени 3 милиони евра.

Околу 32 милиони евра се сите расходи од државниот буџет со кои преку Дирекцијата индиректно се работи во корист на опслужување на инвеститорите во слободните индустриски зони.

Тука не се вклучени парите кои Владата директно им ги дава како државна помош по други законски основи на сопствениците на фабриките. Освен преку Дирекцијата, Владата ги помага инвеститорите во зоните и директно со свои средства врз основа на потпишаните договори, а најчеса помош се грантови за остварената инвестиција, нови вработувања, плати и придонеси, како и даночните и царинските давачки.

А.К.