НАПРАВИЛ ПРЕСЕДАН: Партијата на Павле Трајанов бара разрешување на Кренар Лога

Добивај вести на Viber

Партијата Демократски сојуз го обвини министерот за правда, Кренар Лога за злоупотреба на службената положба и бара негово разрешување.

Обвинија дека Лога донел Упатство за водење на матичните евиденции во кое, покрај податоците кои се утврдени со Законот за матични евиденции, министерот вовел графа во која се искажува и националната, односно етничката припадност. Националната и етничката припадност на една личност, велат од партијата на Павле Трајанов е неприкосновено човеково право кое не може да се изјавува во официјален документ без промена на Законот и без поддршка од граѓаните. Партијата побара од Владата итно да го повлече ваквото, како што велат, незаконито Упатство, велејќи дека она што го направил министерот за правда Кренар Лога е преседан.

„Злоупотребите со балансерот при вработување треба да се спречат со укинување на овој неефикасен и дискриминирачки механизам, а не да се користат како изговор за менување на матичните евиденции без законска основа“, се наведува во писменото соопштение на Демократски сојуз.

Оттаму додаваат дека националната и етничка припадност никаде во светот, вклучително и во земјите членки во Европската Унија, не се впишува во изводите за матична евиденција ниту, пак, во документите за идентификација.

Лога денеска му порача на претседателот на Левица, Димитар Апасиев дека треба да се гордее што во изводите ќе стои националноста. Вели дека денес сиромашниот Македонец се пишува како нешто друго поради немањето перспектива. 

фото Фејсбук