НЕКОГАШ ЈА НАРЕКУВАЛЕ ХРАНА ЗА СИРОМАШНИ: Денес истата е потребна за здрави и избалансирани оброци
Објавено во: Македонија 29 Август, 2024
Во минатото
повеќе намирници се сметале како храна за сиромашни, а денес свесноста за
здравата храна е на повисоко ниво и истите продукти се препорачуваат да се
користат за избалансирани оброци. Во медиумите често читаме за намирници кои важеле
за храна за сиромашни, а денес се ценети или дури се луксуз. Нашите предци,
јаделе ‘ржен леб поради тоа
што биле сиромашни.
Нутриционистот Емилија Спасовска Мојсовска вели дека во минатото, храната за сиромашните била обично основна, едноставна и економична.
„Некои од основните намирници кои се користеле вклучувале: грав и леќа. Гравот и леќата биле основни извори на протеини и влакна. Тие биле достапни и лесни за складирање. Пченката се користела за правење различни јадења како што се пченкарна каша и пченкарни лепчиња. Таа била евтина и лесно достапна. Овесот се користел за правење овесна каша, која била хранлива и достапна.‘Ржениот леб бил евтин и имал долг рок на траење, што го правело погоден за секојдневна исхрана. Растителните култури како компири, моркови и зелка биле чести во исхраната на сиромашните поради нивната достапност и способноста да се чуваат подолго време. Во некои региони, млекото и сирењето биле основни извори на протеини и калциум. Оваа храна била избрана поради својата достапност, ниска цена и способности да обезбеди основни нутриенти. Културните навики и земјоделските практики на одредената област исто така влијаеле на типот на храна достапна за сиромашните“, вели Спасовска Мојсовска.
Има неколку фактори поради кои во минатото посиромашните слоеви ги користеле овие видови храна. Тие бирале намирници кои се евтини, лесно се подготвуваат и имаат долг рок на траење.
„Таа храна била често користена од неколку причини: ценовна достапност: гравот, булгурот и ‘ржениот леб се поевтини и помалку скапи од другите намирници, што ги прави достапни за луѓето со ограничен буџет. Трајност: ‘ржениот леб, на пример, има долг рок на траење и може да се чува подолго време, што е корисно за луѓето кои немаат можност да купуваат свежа храна секој ден. Хранливи својства: oвие намирници се хранливи и обезбедуваат важни нутриенти. Гравот е добар извор на протеини и влакна, булгурот содржи витамини и минерали, а ‘ржeниот леб е богат со влакна. Лесна подготовка: oвие намирници се лесни за подготовка и можат да се користат во различни јадења, што ги прави практични за секојдневна употреба. Така, овие причини ја објаснуваат честата употреба на овие намирници меѓу сиромашните луѓе. Па би се надоврзала на сето ова - храна која изобилува со потребните нутриенти и е препорачана во рамките на здрави и избалансирани оброци е токму оваа храна“, објаснува нутриционистот.
Бакаларот порано го нарекувале храна за сиромашни, а последниве 10 години поскапува и е баран во европските земји. На балканските простори, чварките ги сметале како храна за сиромашни, а денес и тие се многу поскапени, така што многу граѓани не можат да си ги дозволат. Дури се верува дека во 18 век и пицата била храна за сиромашни.
Сања Атанасовскаfoto freepik.com/azerbaijan_stockers