НЕМА ПАРИ ЗА НОВИ ОБУВКИ ЗА ПЕНЗИОНЕРИТЕ: Нов протест - стари маки, бараат раст на пензиите и ослободување од партиципација

Добивај вести на Viber

Пензионери од повеќе градови од Македонија денеска пред Собранието во Скопје излегоа на протест поради, како што велат, незадоволство од антикризните мерки.

Пензионерот Орце Давитков, кој е член на Иницијативниот одбор, при Здружение на пензионери „За достоинствен живот“ од Кочани, во изјава за медиуми рече дека нивните барања се, по пет илјади денари линеарно зголемување на сите пензии и 18 илјади денари минимална пензија. Исто така бараат жените над 62 и мажите над 64 години да не плаќаат ништо во здравството, да бидат ослободени од партиципација, за, како што нагласи, последните денови од животот да ги поминат достоинствено.

- Наместо да одиме напред со пензиите, ние се враќаме назад, очигледно дека пензионерскиот систем не е добар - нагласи тој, додавајќи дека револтот кај нив е голем.

Барањата, како што рече тој веќе ги поднеле до Парламентот.

Моне Горгиев од Кочани, секретар на Здружението, рече дека имаат поддршка од една политичка партија, чии пратеници им рекле дека најбрзо штом ќе дошле на власт, ќе ги решеле проблемите на пензионерите.

- Пензијата не стига за трошковите. А не па за нешто друго, како бањско лекување, за тоа нема теоретски шанси. Пензионерот е доведен до работ на егзистенцијата - нагласи Горгиев.

Незадоволни од односот на власта кон нив, пензионерите денеска пред Собранието оставија стари обувки за да видат оние што се на власт дека со нивните мали пензии само стари  обувки можат да си дозволат, новите за нив се луксуз.

Тие исто така посочија дека иако протестираат уште од август, а сега веќе се ближи Новата година, сметаат дека власта очигледно нема слух за нивните проблеми.