Нема помош за Кипар, Брисел бара контрола на перењето пари

Добивај вести на Viber

Министрите за финансии на Еврогрупата не постигнаа договор финансиска помош од 17,5 милјарди евра за Кипар кој е загрозен од банкрот. Како што пренесуваат грчките медиуми, пред да се постигне конкретен договор министрите за финансии на еврозоната побараа да се донесе одлука со која ќе се контролира придржувањето на Кипар до законите против перење пари. Уште пред вчерашната седница во Брисел набљудувачите оценија дека Еврогрупата пред да донесе одлука ќе ги почека резултатите од изборите во средоземноморската земја, закажани за средината на февруари. На наредната седница, на почетокот на март, треба повторно да се разговара за состојбата на Кипар. Еврозоната и Меѓународниот монетарен фонд се во преговори со Кипар за пакет помош со волумен од 17,5 милијарди евра, поради тоа што банките во таа земја се најдоа во голема криза по отпишувањето на дел од долговите за Грција. Кипар поднесе барање за помош минатото лето. Како услов кој мора да биде исполнет за да се добие помош од фондовите за спас на ЕУ, министрите на Еврогрупата го поставија ефикасното спроведување на мерките за спречување на перење пари. За тоа да се контролира, една приватна фирма по налог на Еврогрупата ќе врши контрола дали владата во Никозија тоа го прави доволно решително. Кипар ги демантира обвинувањата за перење пари преку банките во земјата