ООН: Македонија на 118. место на скалата на среќни нации

Добивај вести на Viber

Организацијата на Обединетите Нации, за првпат, направи анализа и објави извештај во кој се мери среќниот, слободниот и безгрижниот живот на луѓето. Во анализата се опфатени се 156 држави од целиот свет, а Македонија на скалата на среќата се најде на 118-та позиција. Според извештајот, жителите на Данска ги уживаат најголемите бенефити и живеат најсреќен живот, на второ место се граѓаните на Норвешка, а трети се Швајцарците. Од нашето опкружување, само Бугарија е под нас на листата, односно жителите на Бугарија според извештајот за среќен живот се на 144. место. На дното на извештајот се најдоа Централната Африканска Република, Бенин и на 156. место е Того. Колку е среќна една нација се мери според неколку критериуми, меѓу кои реалниот бруто домашен производ по глава на жител, здрав животен век, личност на која може да се потпрете во животот, носење на слободни животни одлуки, слобода од корупција и великодушност. Според расположливите информации, дури во 60 земји од кои се опфатени во ова неколкугодишно истражување значително е подобрен животот на цела нација. Креаторите на ова истражување дојдоа до заклучокот на нивната работа, односно одговорот на прашањето – Што е она што влијае на среќата? Според нив одговорот лежел во менталното здравје на луѓето.