Добивај вести на Viber
Градоначалникот на Општина Гази Баба, Бобан Стефковски, доцна синоќа најостро го осуди сквернавењето на споменикот на бранителот од Диво Насеље, Горан Стојменовиќ, во Инџиково. Осквернавени се и иконите од осветениот крст. Градоначалникот порача дека спомен-обележјето ќе биде обновено.
„Изразувам најостра осуда за вечерашното сквернавење на споменикот на загинатиот бранител во борбите во Диво Насеље, Горан Стојменовиќ како и на иконите кои се дел од осветениот крст поставен во истиот парк во Инџиково. Ваквиот сторен чин на денешниот голем македонски празник Илинден и христијански празник Св. Илија преставува срамен и кукавички чин кој е за најостра осуда“, објави градоначалникот на Гази Баба.
Стефковски побара од Министерството за внатрешни работи што е можно побргу да ги пронајде сторителите.
„Како градоначалник на општина Гази Баба, БАРАМ итно и неодложно превземање на сите законски дејствија од страна на Министерството за внатрешни работи и час поскоро сторителите на овој чин да бидат изведени пред лицето на правдата.
На граѓаните сакам да им порачам да бидат спокојни. И споменикот и иконите ќе ги обновиме, а традицијата на оддавање почит на херојот Горан Стојменовиќ, како и чествувањето на Соборот на 12те Апостоли во Инџиково ќе продолжи!“, додава тој.