ПОЛИЦИЈАТА АПЕЛИРА ДО ГРАЃАНИТЕ: Не отворајте сомнителни мејлови, внимавајте каде оставате лични податоци

Добивај вести на Viber

Полицијата ги предупредува граѓаните да не отвораат сомнителни мејлови и да внимаваат каде споделуваат лични податоци. 

Министерството за внатрешни работи преку Секторот за компјутерски криминал ги предупреди граѓаните за зголемениот број на фишинг измами и случаи на лажно претставување, насочени кон прибирање лични податоци и финансиски средства. Измамите, кои се јавуваат во различни форми, претставуваат сериозна закана за безбедноста на граѓаните.

Најчесто измамниците испраќаат СМС пораки во кои информираат дека граѓаните имаат наводна пратка на нивно име, за која треба да доплатат минимална сума. Во пораките е вклучен линк што води кон лажна веб-страница, дизајнирана да изгледа како официјална страна на Пошта на Македонија или други институции.

По внесувањето на податоци од платежни картички, граѓаните стануваат жртви на финансиски измами.

„Обично, првобитната трансакција е минимална, но потоа се извршуваат поголеми трансакции“, информираат од полицијата.

Во последно време, граѓаните се таргетирани и преку лажни платформи за инвестирање во криптовалути. Жртвите често се контактирани телефонски од странски броеви од лица кои се претставуваат како финансиски советници.

„Со долготрајна комуникација и убедување, сторителите ги наведуваат жртвите да вложат значителни суми. Но, кога ќе се обидат да ги повлечат средствата, се појавуваат измислени препреки,“ велат од Секторот за компјутерски криминал.

Од МВР апелираат до граѓаните:

– Не отворајте сомнителни линкови и датотеки од непознати испраќачи.
– Не споделувајте лични податоци и информации од платежни картички на непознати веб-страници.
– Внимавајте на непознати телефонски повици, особено од странски броеви.
– Проверете ја легитимноста на платформите за инвестирање преку интернет и меѓународни регулативи.

„Граѓаните мора да бидат внимателни и да не стануваат лесна мета на ваквите измами. Секој сомнителен случај треба веднаш да се пријави“, изјавија од Секторот за компјутерски криминал.

Со зголемено внимание и соработка, граѓаните можат да ги избегнат опасностите што доаѓаат со фишинг пораките и лажните инвестиции.