Полицијата уапси двајца Бугари кои измамиле повозрасни лица и ги оштетиле за илјадници евра

Добивај вести на Viber

Полицијата приведе двајца измамници од Бугарија, кои се обидувале да изнудат пари од постари лица. 

Полициски службеници од СВР Скопје ги приведоа К.О.И.(51) и Г.Е.М. (56), двајцата од Благоевград, Република Бугарија кои со измама се обиделе да земат 20.000 евра од 65-годишна жена од Скопје.  Tие ја лажеле жената дека нејзината ќерка прегазила дете и дека тие ќе и помогнеле за да не оди во затвор.

Вчера кај 65-годишната жена од Скопје на телефон се јавило непознато лице кое се претставило дека наводно е полициски началник и кажало дека нејзината ќерка предизвикала сообраќајна несреќа, при што згазила дете и ако сака да ја спаси од затвор требало да му даде 20.000 евра. Оштетената му рекла дека има дома само 7.500 евра, а другите пари ќе ги даде дополнително. Измамникот рекол парите што ги има да ги даде веднаш, а останатите наредниот ден, па оштетената околу 16:00 часот на локација во општина Аеродром ги дала парите на, за неа, непознато лице. Денеска, измамникот повторно се јавил околу 7 часот, по што оштетената го пријавила случајот во Полициска станица Аеродром.

Веднаш по добиената пријава, полициски службеници од СВР Скопје презедоа соодветни мерки и активности за приведување на измамниците и дадени се насоки на оштетената како да постапува. Откако на подрачјето на општина Центар оштетената му ги дала парите на измамникот, тој е лишен од слобода и утврдено е дека станува збор за К.О.И.. Веднаш потоа е приведена и Г.Е.М., која го чекала во ресторан, во близина на местото каде К.О.И. беше лишен од слобода. Кај нив се пронајдени пари кои потекнуваат од кривични дела. К.О.И. во службен разговор го призна делото, а признал и дека на сличен начин измамил лице од Кавадарци и лице од Охрид. По документирање на случајот, во координација со ОЈО ќе биде поднесена соодветна кривична пријава.

Полицијата апелира граѓаните да на наседнуваат на вакви измами и да пријават во полиција.