„ПУЦКО ПЕТРОЛ“ РЕГИСТРИРА ПОДРУЖНИЦА ВО КИСЕЛА ВОДА - од компанијата велат дека тоа се стари складишта кои ги имале од поодамна

Добивај вести на Viber

Компанијата од нафтениот бизнис „Пуцко петрол“ регистрира подружница во Кисела Вода, која ќе работи во форма на складиште на големо, наменето за трговија на големо со цврсти, течни и гасовити горива и слични производи.

Ова информација може да се види од Централниот регистар, каде што е регистрирана подружницата на компанијта.

Фактор ја праша компанијата зошто се регистрира ова складиште, колкаво ќе биде, која е прецизната локација, и дали неговата регистрација има врска со големата енергетска криза во земјава, па заради тоа компанијата го проширува обемот на работење.

Од „Пуцко петрол“ не сакаат многу да зборуваат на оваа тема, со образложение дека станувало збор за стари складишта кои компанијата ги има од поодамна, и затоа нема што тука ново да и се соопшти на јавноста во врска со нив. Но, немаше прецизен одговор на нашето прашање зошто токму сега те се регистрирала таа подружница.

Инаку, како што е наведено во објавата во Централниот регистар, друштвото за трговија, производство и услуги „Пуцко петрол“ од село Пласница, донело одлука за организирање на подружница на 7 септември оваа година, што значи пред само неколку дена.

Како вид на промена всушност се регистрира промена кај подружницата, за која се наведува дека е склад на големо, за трговија на големо со цврсти, течни и гасовити горива и слични производи.

Складиштето се наоѓа на улицата „Првомајска“, стои во објавата.

Како овластено лице на подружницата, пак, е именувана Божанка Грозданова, која е економист, се наведува во објавата.

Останува во наредниот период да се види како ќе функционира подружницата на „Пуцко петрол“.

Н.Н.Ф.