„РАСТУРИЛЕ“ ОД ПАРИ И ОДЛИЧЕН ПРОФИТ, ИАКО И ДОСТА ТРОШЕЛЕ - како јавното претпријатие Државни патишта направи добивка од 25 милиони евра

Добивај вести на Viber

Како им успеало не се знае, ама Јавното претпријатие за државни патишта остварило фантастична добивка во првите шест месеци од годинава, или близу 25 милиони евра за едно полугодие.

Калкулаторот на Министерството за финансии, кое на секој квартал презентира анализа на финансиските резултати на јавните претпријатија и државните акционерски друштва, покажал дека во првите две тримесечја од годинава ЈПДП оствариле вкупни приходи од фантастични 45,8 милиони евра, додека, пак, нивните расходи биле повеќе од двојно помали, и изнесувале 20,9 милиони евра. Таа разлика всушност го прави одличниот профит од 24,9 милиони евра, покажуваат податоците на Финансии.

ЈПДП, кое управува со државните патишта во земјава, но и се задолжува и инвестира во изградба на патишта, врши и наплата на патарините, односно кај него се слеваат надоместоците за користење на јавните патишта во земјава.

Очигледно дека во првата половина од годинава многу се патувало во земјава, што било причина да се инкасираат одлични приходи од нивната наплата. Во тоа претпријатие се слеваат и државните пари кои потоа одат за плаќање на патиштата. Додека, пак, за задолжувањето што го прави претпријатието, гарантира државата.

Фактор неодамна објави дека, споед новиот извештај за работата на ЈП „Државни патишта за 2022  година, до крајот на минатата година веќе биле потрошени околу 450 милиони евра за автопатот Кичево-Охрид. 

„Вкупно реализирано 447.383.985 евра (заклучно со 62-та ситуација), што изнесува 66 отсто во однос на 598.074.670 евра“, запишано е во отчетот на јавното претпријатие.

До 1 јули за оваа година за реализација на автопатската делница Кичево - Охрид финансирана од кинеската Ексим Банка потрошени се 1,006 милијарди денари, или само 16,36 милиони евра, стои дополнително во полугодишниот извештај на ЈПДП за првата половина од 2023, пишуваш на почетокот на овој месец Фактор.

ЈПДП за првото полугодие е најдоброто државно претпријатие според финансискиот резултат.

Повеќе од одлично му одело и на МЕПСО, АД за пренос на електрична енергија и управување со електроенергетскиот систем во државна сопственост. Ова друштво во првото полугодие остварило одлична добивка од 7,3 милиони евра за шест месеци, со што се најде на втората позиција.

Затоа, пак, државните електрани кои ја произведуваат струјата, имале многу помала добивка, за дури 10 пати, остварувајќи само 733 илјади евра профит во првите шест месеци од годинава.

Инаку, на трето место според профитабилноста, се најде Државна Лотарија на Македонија, чија добивка во првото полугодие изнесувала 4,34 милиони евра.

Зачудувачки, но следува АД Железници Транспорт, кои се најголем должник во земјава, а што е уште позачудувачки, нивниот профит во првите шест месеци е безмалку 2 милиони евра.

По нив е М-НАВ, со добивка од 1,76 милиони евра, по кои иде националниот јавен сервис, ЈРП МРТВ, со добивка од сосема солидни 1,4 милиони евра за првите шест месеци.

Но, не им одело на сите добро во првото полугодие.

Најлошо всушност му било на ЈП Железници Инфраструктура, исто така страшен државен должник, и кој за разлика од својот „брат“ кој е профитабилен, има огромна загуба од 2,1 милиони евра.

Воопшто подобри не се ни ЈП Национални шуми, кои за шест месеци „натепале“ огромен минус од 1,8 милиони евра.

Со огромна загуба од близу 900 илјади евра следува ЈП Стрежево, а по него следува АД Водостопанство, со загуба од 645 илјади евра.

Воопшто не се „цвеќе за мирисање“ ни АД Пошта, со загуба од 280 илјади евра за шест месеци, која деновиве само еден вработен ја украде со 50 илјади евра.

По ланската одлична година, во која направи и одличен профит за 1,3 милиони евра, ТЕЦ Неготино во првите шест месеци од годинава има минус од 247 илјади евра.

Н.Н.Ф.