СДСМ: Груевски од страв не ја урна Универзална сала

Добивај вести на Viber

Од опозицијата велат дека лидерот на ВМРО-ДПМНЕ се повлекол од  рушење на Универзалната сала во Скопје поради  две причини.

„Едната е тендерска, а втората е страв“, тврдат од партијата на Заев, алудирајќи на тоа како поминале кога решија да го продаваат Офицерскиот дом во Битола па наидоа на отпор кај граѓаните.

„Груевски се плаши. Знае дека првиот момент кога ќе удреше со хебла на Универзална сала во Скопје, тоа ќе значеше удар врз спомените и сеќавањата на скопјани. А веќе го стигнува казната за сите руини што ги направи во 10 годишниот мандат“, изјави Роберт Алаѓозовски, претседател на Комисијата за култура на СДСМ.

 Оттаму посочуваат дека Универзална сала е културна знаменитост на градот и дека во неа се случија најдобрите музички концерти во земјата.

„ Граѓаните тука го култивираа својот вкус и фаќаа приклучок со светските случувања на современата музичка и изведувачка сцена. Во Универзална сала се случија театарски и мултимедијални продукции, и настани од  популарната култура, што влегоа во културната меморија на градот и на скопјани“, велат од СДСМ.

Инаку, вчера надлежните соопштија дека најавената јајцвидна концертна сала која требаше да се најди на местото на Универзална сала во Скопје сепак нема да се гради.

Владата се повлече и се одлучи да „игра” на поевтина карта, па ќе се врши само реконструкција.

Причината да се одбере ова решение како што посочи министерката за култура Канческа Милевска е моменталната економска ситуација и економската неоправданост на проектот.

Претходно беа планирани 65 милиони евра за уривање и градење на нова со  2.500 до 3.000 седишта, мала за камерни изведби со околу 300 места и административни простории.

Реконструкцијата пак ќе чини 15 милиони евра.