СЕ ОЧЕКУВА СМЕНА НА НАЈМАЛКУ ЧЕТВОРИЦА МИНИСТРИ - ќе заминат ли Николовски, Спасовски, Царовска
Објавено во: Македонија 18 Декември, 2021
Премиерот Заев, најверојатно во среда до Собранието ќе ја поднесе оставката на премиерската функција, јавува ТВ 21.
По ова, во оставка ќе биде целата Влада, а идниот владин кабинет се очекува да го состави новиот претседател на СДСМ Димитар Ковачевски. Според она што досега беше и официјално најавено, повеќе нема да биде во Владата министерот за здравство Венко Филипче кој вчера од Охрид ја потврди ваквата одлука, а вчера своето заминување го обзнани и министерката за одбрана Радмила Шекеринска, која уште во мај годинава се откажа и од партиските функции. Од она што пак неофицијално се дознава од Владата заминуваат и вицепремиерот за борба со корупција Љупчо Николовски, кој најверојатно нема повеќе да биде ниту генерален секретар на СДСМ. Во идниот состав најверојатно нема да бидат ниту вицепремиерот за европски прашања Никола Димитров, како и министрите за правда Бојан Маричиќ и за образование Мила Царовска. Засега неизвесно останува што ќе се случи со министерот за внатрешни работи Оливер Спасовски, кој според неофицијални информации заминува од оваа позиција.
Идната недела треба да се одржи и седница на Централниот одбор на СДСМ на која треба да се избере и новото раководство на СДСМ по што ќе биде познато и кои ќе бидат идните потпретседателите, како и генералниот секретар на партијата.