Шеќеринска: Република Илинденска Македонија претставува одлична база за решение
Објавено во: Македонија 20 Мај, 2018
Вицепремиерката и министерка за одбрана, Радмила Шекеринска изјави дека предлогот Република Илинденска Македонија е решение со кое сите од процесот на решавање ќе излезат како победници.
Таа вели дека наоѓање такво решение било цел на македонскиот преговарачки тим.
„Она што беше нашата цел, а тоа е да најдеме решение кое што ќе биде позитивно и за Македонија и за Грција, сметаме дека е постигнато со овој пакет и не случајно премиерот вчера јасно порача дека сметаме дека пакетот кој што беше усогласен, нуди шанса сите да излезат од овој процес како победници. Ние сметаме дека Република Илинденска Македонија претставува одлична база за решение, заради тоа што таа подразбира временска одредница, таа се поклопува со важни датуми од нашата историја и таа покажува дека Република Македонија ниту имала ниту ќе има територијални претензии“- кажа Шекеринска.
Според неа, сите елементи одговараат на очекувањата и на барањата во Македонија и во Грција и затоа најави дека ќе продолжат да работат оти овој пат смета дека сме навистина многу блиску до решение.