Што пишуваат Грците за обраќањето на Туск на македонски?
Објавено во: Македонија, Балкан 28 Април, 2018
Медиумите кај јужниот сосед имаат реакции откако претседателот на Европскиот совет, Доналд Туск, при неговиот престој вчера во Скопје, зборуваше на македонски јазик.
За нив, постапката на Туск доаѓа во време кога јазикот и идентитетот на граѓаните на Македонија биле дел од пречките во разговорите за името. Туск изјави дека двете држави треба сами да го решат проблемот, рационално и без емоции, бидејќи рецептот не е во рацете на Брисел.
Грчкиот министер за надворешни работи, Никос Коѕијас е дециден дека ерга омнес е клучот за решението.
„Јасно ставивме до знаење дека за ПЈРМ да добие покана за НАТО, ќе мора да ја спроведе одлуката од Букурешт во 2008 година, како и резултатите од преговорите. Другата страна мора да сфати дека мора да се согласи за ерга-омнес и да одиме кон општ позитивен договор“- изјави Коѕијас.
Американскиот амбасадор во Атина, Џефри Пајет во своето обраќање пред студентите во Солун ја изнесе својата оценка дека преговорите за името меѓу Македонија и Грција одат во добра насока.
Преговорите за спорот со името продолжуваат. Следната средба на шефови на дипломатии е предвидена за 3 и 4 мај во Солун.