Сметките за струја не стигаат на домашна адреса на граѓаните, Пошта не ги носи

Добивај вести на Viber

Сметките за електрична енергија веќе извесен период не стигнуваат на домашна адреса кај дел од  домаќинствата . Потрошувачи од центарот на Скопје се жалат дека веќе неколку месеци не добиле сметка, по што биле исклучени од мрежа поради неподмирени долгови. 

- Собирам по неколку сметки и ги плаќам редовно. Отидов да прашам во наплатниот центар на универзалниот снабдувач зошто сум исклучен.Од таму ми рекоа дека не сум платил неколку сметки. Јас тие не сум ги добил на домашна адреса, па бев принуден да ги платам одеднаш и да платам за повторен приклучок, се пожали еден постар граѓанин од Центар кој стапи во контакт со редакцијата.

Од универзалниот снабдувач ЕВН Хоме ни рекоа дека имаат договор со АД Пошта за доставување на сметките, но дека од таму неколку години по ред не ги извршуваат задачите целосно.

„ЕВН Македонија ги користи услугите на Македонска пошта за достава на фактури за потрошена електрична енергија до корисниците. Компанијата има на располагање голем број онлајн услуги, дел од што е и електронската достава на фактурите.

На страницата evnonline.mk на многу брз и едноставен начин корисниците може да се регистрираат за добивање на фактурите за електрична енергија по електронски пат или да креираат кориснички профил „Мој ЕВН Хоме“ и во секое време да бидат во можност да преземат фактури.

Со овие услуги фактурите ќе ги добиваат навремено и го ќе избегнуваат моментот на недобивање на истите. Освен тоа, за добивање на фактура корисниците може да се обратат во нашите Кориснички енерго центри и Контакт центарот на ЕВН Македонија“, гласи одговорот кој го добивме од снабдувачот.

Прашања беа испратени и до АД Пошта на РСМ зошто веќе неколку месеци воопшто не се доставуваат фактури на домашна адреса и колку региони се во прашање, но од таму не добивме одговор.

А.К.