СОВЕТОТ НА ЈАВНИ ОБВИНИТЕЛИ ДОНЕСЕ ОДЛУКА: Останува суспензијата за Мустафа Хајрулахи

Добивај вести на Viber

Советот на јавни обвинители ја потврди одлуката на обвинителот Љупчо Коцевски за суспензија на обвинителот Мустафа Хајрулахи.  Одлуката е донесена со седум гласа „за“ и еден „против“.

Членовите на Советот на јавни обвинители со одлука денеска го потврдија решението на државниот  јавен обвинител Љупчо Коцевски за суспензија на вишиот јавен обвинител Мустафа Хајрулахи додека трае кривичната постапка протов него. Советот ја одби жалбата на Хајрулахи како неоснована.

„Се потврдува одлуката со која вишиот јавен обвинител Мустафа Хајрулахи, се оддалечува од вршење на функцијата јавен обвинител за време додека трае кривичната постапка“, изјави денеска претседателката на Советот на јавни обвинители, Душица Димитриевска.

Членот на Советот Кети Петкова, пак, смета дека одлуката треба да се преиначи, затоа што според неа републичкиот обвинител Коцевски со решението за суспендирање на Хајрулахи го крши Законот за јавно обвинителство.

„Недопустливо е повод за суспензија да биде кривична пријава за мобинг“, рече Петкова.

Хајрулахи минатата недела откако го суспендираа од функцијата обвини дека кривичната пријава поднесена против него е со намера да го оцрнат. Тој го обвини републичкиот јавен обвинител Љупчо Коцевски дека му врши брутален притисок, со цел Вишото ЈО да донесе нарачана одлука за предметот со бонусите во поранешното Специјално јавно обвинителство, односно да ја потврди одлуката на ЈО за гонење на организиран криминал и корупција. 

Одлуката за суспендирање на Хајрулахи се случи откако Основното јавно обвинителство Штип донесе наредба за спроведување истражна постапка против него за сторено продолжено кривично дело „малтретирање во вршење на службата“, како и за продолжено кривично дело „злоупотреба на службена положба и овластување“.