„ТОЈ Е ХРАБАР И РЕШИТЕЛЕН“, ОСТАВИЛ ВПЕЧАТОК КАЈ ПОРАНЕШНАТА ГЕРМАНСКА КАНЦЕЛАРКА - Заев е единствениот политичар од Балканот кој се најде во мемоарите на Меркел

Добивај вести на Viber

Поранешниот премиер Зоран Заев денеска е во центарот на вниманието на македонската јавност, откако се најде во мемоарите на неговата исто така екс колешка, некогашната германска канцеларка Ангела Меркел. Во нејзините мемоари од 740 страници „Freiheit“ (Слобода), кои беа објавени на 26 ноември оваа година, таа го открива она што претпочитала да задржи за себе за време на нејзиниот мандат.

Меркел ги оквалификувала Заев како храбар и решителен, во нејзините мемоари кои сведочат за тоа како таа се чувствувала за време на посетите на странските делегации во нејзиниот кабинет, особено истакнувајќи ги нејзините емоции и трепетот што понекогаш го доживувала.

Во мемоарите се спомнуваат многу државници од различни декади, но кога станува збор за регионот, единствен политичар од Балканот кого Меркел го спомнува е поранешниот македонски премиер Зоран Заев, објави на Х германскиот новинар Михаел Мартенс од „Франфуртер алгемајне цајтунг“. Тој пишува дека Заев е единствениот жив политичар од Балканот кого поранешната канцеларка експлицитно го споменува во своите мемоари.

Меркел, како што пишува германскиот новинар, не ги спомнува ниту српскиот претседател Александар Вучиќ, ниту премиерот на Албанија, Еди Рама, ниту Бојко Борисов ниту поранешниот српски претседател Борис Тадиќ.

„Поранешниот австриски канцелар Себастијан Курц не се споменува. Поранешниот грчки министер за финансии, Јанис Варуфакис, исто така. На Западен Балкан, единствениот (жив) политичар кој Меркел го споменува во своите мемоари е Зоран Заев, кого таа го нарекува ‘храбар и решителен’“, пишува германскиот новинар Михаел Мартенс во својата објава на Икс.

Мемоарите на Ангела Меркел насловени како „Слобода“ беа промовирани во Берлин, по три години откако таа ја напушти функцијата.