Добивај вести на Viber
Ивица Томовски, кој неодамна беше назначен за директор на Службата за општи и заеднички работи вели дека продолжува борбата против злоупотребата на државните ресурси, односно се става крај на лошите практики од минатото за користење на државни возила за приватни цели.
На денешната седница на Владата, на негов предлог е формирана комисија составена од СОЗР, Кабинет на Претседател на Влада на Р.М, Генералниот секретаријат, Министерството за финансии, Министерството за внатрешни работи, Министерството за енергетика и Кабинет на Министерот за добро владеење, со цел да почне постапка за измена и дополнување на два важни закона за промоција на транспарентноста и владеењето на правото. Станува збор за Законот за користење и располагање со стварите во државна и стварите во општинска сопственост и Законот за возила.
„Со овие измени ќе се воспостави регистар на сите државни патнички моторни возила кои ќе бидат обележани со регистарски таблици во посебна боја за полесно да бидат забележани од граѓаните. На овој начин, веруваме дека ќе биде оневозможено нивното користење за приватни цели, со што дополнително ќе се зајакне транспарентноста и отчетноста на институциите на државата“, пишува Томовски на социјалните мрежи.
Додава дека отваруваат уште едно предизборно ветување. Во минатото имаше критики за функционерите дека со службени возила оделе на партиски митинзи и по приватни потреби.