ВО ДЕБАР БОЛНИТЕ ОД КОВИД ГИ ЛЕКУВААТ ВО ДНЕВНА БОЛНИЦА: Неделава Интерното одделение се пренаменува во ковид-центар за хоспитализација

Добивај вести на Viber

Заразените пациенти од корона вирусот во Дебар, засега се уште ги третираат само во дневната болница, бидејќи таму до сега не се правеа хоспитализации, иако дел од нив се со средно тешка клиничка слика, вели за Фактор, интернистот, д-р. Драган Клопчевски.

-Потешките пациенти на кои им е потребна итна хоспитализација ги трансферираме со наши амбулантни возила во ковид-центрите во Скопје. И покрај тоа што веќе одделенијата се веќе преполнети, сепак наидуваме на разбирање и успеваме да ги хоспитализираме. Но, тоа е веќе максимумот кој може да го издржат болничките капацитети во Скопје, заради што од оваа недела Интерното одделение во Дебар ќе биде пренаменето во ковид-центар и тука ќе можеме да хоспитализираме 20 пациенти токму од Дебар, вели д-р. Клопчевски.

Истовремено нагласува дека оние кои се со средно тешка клиничка слика добиваат терапија во дневната болница болница во рамки на Општата болница во Дебар, а станува збор за третман со инфузија и оксигенска терапија.

-Секојдневно доаѓаат болни пациенти и во ниту еден момент не сме ги оставиле без терапија. Но има најмалку двајца кои мораме да ги донесеме во скопје, зошто нивната здравствена состојба бара исклучиво болничко лекување. Очекуваме интерното одделение да биде целосно готово за неколку дена. Располагаме и со кадар, имаме четворица лекари интернисти и инфектолог, како и медицински сестри. Се надевам ќе одговориме на предизвикот и во налетот на нови пациенти, потенцира Клопчевски.

За состојбата во Дебар нагласува дека луѓето сега посериозно ја сфаќаат сериозноста со корона вирусот, но како што вели, Ковид е насекаде распространет, па токму затоа и инфекциите се чести. Неговиот апел, како и на сите здравствени работници е доколку немаат потреба граѓаните да не излегуваат од дома, а ако е тоа неопходно максимално да се почитуваат мерките за заштита.

Анита Буховски