Во октомври ќе почне да се гради Клиничката болница во Штип
Објавено во: Економија 07 Август, 2015
Новата Клиничка болница во Штип, ќе чини 30 милиони евра, а ќе почне да се гради во средината на октомври и треба да е завршена за две години, ова го најави денеска, министерот за здравство Никола Тодоров.
,,Објектот ќе се гради на сегашната локација на болничкиот комплекс, на местото меѓу главната болничка зграда, зградата на инфективното одделение и зградата на сегашна педијатрија. Ќе опфати површина од околу 34.000 метри квадратни бруто површина. Станува збор за инвестиција во вредност од околу 30 милиони евра" -рече Тодоров.
Планирано е новата болница да овозможи здравствена заштита на над 200 000 жители и ќе има 354 легла.
Министерот рече дека овој проект го подготвувале две години и на него работеле пет стручни тимови.
Тодоров вели дека болницата ќе има карактеристики и функционалности од врвни стандарди какви што досега немало во Македонија.
,,Сите содржини на болницата се соодветно групирани и распределени на осум нивоа, а меѓусебно се поврзани со внатрешни топли врски по хоризонтала и вертикала. Внатрешната комуникација и транспортот на материјалите помеѓу катовите ќе се одвива со 14 лифтови. На покривот на нивоата на машинска сала и на последното ниво, предвидено е да се постават градини, од кои дел ќе бидат проодни и ќе може да се користат од вработени и/или пациенти, а дел непроодни и ќе имаат сопствен инсталиран систем за наводнување" - рече Тодоров.
Тендерот за изградба на болницата бил објавен вчера во официјалниот гласник на Европската унија од страна на Банката на Советот на Европа.