ВО ПОРАНЕШНА ГРАДСКА БОЛНИЦА ЗА 5 МЕСЕЦИ 50 ИЛЈАДИ ПРЕГЛЕДИ И ПОВЕЌЕ ОД 850 ОПЕРАЦИИ: Се хоспитализираат пациенти кои немаат ковид

Добивај вести на Viber

Во изминативе 5 месеци, од март, откако беше прогласена епидемијата на корона вирусот, до крајот на јулисе извршени над 50 илјади прегледи и повеќе од 850 операции во Универзитетската клиника по хируршки болести „Св. Наум Охридски“, или позната како поранешна Градска болница во центарот на Скопје, а реализирани се во просек, на месечно ниво 10 илјади прегледи, соопштија од оваа здравствена установа.

Откако беше прогласена епидемијата на Ковид-19 во Македонија, Клиниката по хируршки болести „Св. Наум Охридски“, беше определена како болница во која се вршат хируршки третмани на пациенти кои не се инфицирани со коронавирус.

Директорот на Клиниката по хируршки болести „Св. Наум Охридски“, д-р Љубен Арсенков, потенцира дека сите пациенти се примени и ниту еден пациент не бил вратен или упатен во друга здравствена установа поради немање соодветен упат од матичен лекар или специјалист од секундарното здравство.

„Направена е реорганизација на работата во поликлиниката за да се намали ризикот од трансмисија на вирусот меѓу персоналот и пациентите. По првичното работење со две ургентни амбуланти, воведено на 23 март, веќе од 18 мај се отворени сите специјалистички амбуланти, кои секојдневно функционираат и покрај тоа што нема закажани термини преку националниот систем МојТермин. Болницата функционира со кадар од 70 доктори, 85 сестри, 36 болничари, 10 лаборанти и 18 рендген техничари. Од вкупниот кадар во установата, 7.5% се ослободени во континуитет по одлука на влада (бременост, хронични болести и друго). Иако се наоѓаме во фаза на реконструкција, беше организиран и изолаторен дел, каде се хоспитализираат пациентите како итни случаи, и им се врши тестирање за инфекција со коронавирусот. Доколку состојбата на пациентот тоа го дозволува, во рок од 24 часа го имаме резултатот, по што се продолжува со третманот“, вели д-р Арсенков. Тој појаснува дека од почеток на јули е спроведен скрининг на вработените за присуство на антитела од COVID-19 и само четири вработени имале позитивен резултат за претходно прележана инфекција. Тоа говори за успешното спроведување на мерките за лична заштита.

Инаку, во оваа установа, на 27 февруари 2020г. е формирано координативно тело за справување со коронавирусот и донесени се протоколи за работа во услови на пандемија, со кои максимално се заштитени пациентите кои се прегледуваат, како и пресоналот кој работи во клиниката.

„Континуирано работиме на обезбедување адекватна заштитна опрема и услови во кои ќе продолжиме со безбедно работење, со цел подобрување на здравјето на граѓаните и обезбедување највисоко ниво на здравствена грижа“, вели д-р Арсенков.