Заев и Каминис се сретнаа за продлжената „нормализација“ на односите со Грција
Објавено во: Македонија 28 Април, 2018
Македонија и Грција можеби и натаму се далеку од постигнување на долгопосакуваното решение на спорот за името, но затоа пак во последниот период со засилените дипломатски напори се прават обид да се нормализираат односите меѓу двете соседни земји и да се гради основа за пријателство, доверба и соработка. Во тој дух, вчера се одржа и средбата на македонскиот премиер Зоран Заев со градоначалникот на Атина Јоргос Каминис кој претходно му беше гостин и на скопскиот колега Шилегов.
– Одговорни сме за иднината на сегашните, но и на идните генерации, и треба да ги развиваме нашите пријателски односи. Скопје е најголем град во нашата држава, ќе биде од значење размената на искуства меѓу нашиот главен град и Атина во делот на позитивни практики на менаџирањето – рече премиерот Заев.
Градоначалникот на Атина изрази разбирање за евро-атлантските аспирации на државава. Тој додаде дека е отворен прозорец на можности за владите на двете земји да најдат решение за отвореното билатерално прашање.
– Грција е една од најстарите земји членки на НАТО и ЕУ и мора да биде лидер во обезбедувањето евро-атлантска иднина за целиот регион. Работиме и на клучните реформски процеси, градиме едно општество за сите граѓани и ќе направиме сè што е до нас да биде најдено заедничко прифатливо решение. Во меѓувреме добро е што постои политичка волја, ќе ги зајакнуваме довербата, меѓусебната соработка и добрососедските односи – додаде премиерот.
На средбата Заев и Каминис се согласија и дека Балканот мора да остане стабилен и дека тоа е можно со чиста визија на лидерите и на владите, но и на другите политички субјекти во државите и општествените фактори кон каде се оди.