26 нови соби за студентите во Стив – Гоце Делчев чека избор на изведувач

Добивај вести на Viber

Студентите во домот „Стив Наумов“ во Автокоманда од денеска имаат осум нови павиљони со 26 соби. Станува збор за инвестицијата вредна 103 милиони денари обезбедена од Министерството за образование и наука. Во четири од сместувачките објекти има 10 соби, а во останатите 16 соби. Во секој од објектите има посебни соби и за лицата со посебни потреби. -Објектите се изградени по највисоки стандарди. Врз основа на проекциите постои можност за сместување на 140 студенти но исто така и за надградба во делот на креветите. Во следниот период во рамки на новиот оглас за сместување од октомври ќе бидат сместени студенти од целата држава кои ќе аплицираат, рече министерот за образование и наука Спиро Ристовски, кој заедно со премиерот Никола Груевски и директорката на студенскиот дом ги посетија објектите. Просторот кој опфаќа 2.000 метри квадратни ги задоволува стандардите за квалитетно студентско сместување, смета Ристовски. Завршено било и поднесувањето на понуди за првата фаза од реконструкцијата на студенскиот дом „Гоце Делчев“, а според најавите од министерот во следните денови треба да се одржи електронската аукција. - По нејзиното завршување, доколку се биде во рамки на законот, се очекува да започне првата фаза од реконструкцијата на студенскиот дом. Можеби нема да може да одговориме во целост на сите потребни барања, но треба да бидеме рационални бидејќи многу е поважно во следните две години како што е планирано во фази да заврши комплетната реконструкција и да се обезбедат соодветни услови за студентите, рече Ристовски. За студенскиот дом „Невена Ѓорѓиева-Дуња“ познат како Медицинар, како што информира Ристовски, има изготвено проектен план и ќе се планираат следните чекори.