БАЈДЕН ЗА ПРЕСУДАТА ПРОТИВ ТРАМП: Никој не е над законот
Објавено во: Свет 31 Мај, 2024
Според американскиот претседател Џо Бајден, пресудата на екс претседателот Доналд Трамп во судскиот процес за поткуп на ѕвездата од филмовите за возрасни го потврди „американскиот принцип дека никој не е над законот“.
Говорејќи од Белата куќа, Бајден вели дека поротата е составена од Американци, кои ги слушнале доказите и донеле едногласна пресуда.
„Доналд Трамп ги доби сите можности да се брани. Државен случај, а не федерален. Го разгледуваше порота од 12 граѓани. Дванаесет Американци. Дванаесет луѓе како вас, како милиони Американци кои беа во поротата“, вели Бајден.
Додаде дека поротата за Трамп е „избрана на ист начин како што е секоја порота во Америка“ и дека тоа е „процес во кој учествувал адвокатот на Доналд Трамп“.
„Поротата сослуша петнеделни докази. По пет недели внимателно размислување, поротата донесе едногласна пресуда. Тие го прогласија Доналд Трамп за виновен по сите 34 точки од обвинението“, додаде тој.
Бајден рече дека Трамп сега ќе има можност да се жали на одлуката бидејќи „така функционира американскиот правосуден систем“.
Трамп кој на 30 мај е прогласен за виновен за фалсификување документи, остро го критикуваше судскиот процес и најави жалба на пресудата.
Трамп ги повтори своите поплаки дека судењето е обид да се спречи неговото враќање во Белата куќа и предупреди дека тоа покажува дека ниту еден Американец не е безбеден од политички мотивиран прогон.
Поротата во Њујорк го прогласи Трамп за виновен по сите 34 точки од обвинението за фалсификување документи за прикривање на плаќањата на порно ѕвездата Сторми Даниелс во последните денови од неговата претседателска кампања во 2016 година.
Трамп сè уште се соочува со три други кривични обвиненија, а за сите се изјасни за невин и вели дека се политички мотивирани.