БРИТАНСКИ АДМИРАЛ: Украина на крајот ќе победи во војната и покрај неодамнешниот тактички напредок на Русија
Објавено во: Свет 03 Јуни, 2024
Повеќе од две години трае војната во Украина, а началникот на војската на Обединетото Кралство, адмирал Антониј Радакин, е уверен дека Украина на крајот ќе победи во војната и покрај неодамнешниот тактички напредок на Русија.
Москва почна нова офанзива на 10 мај во северниот дел на Харковската област. До крајот на месецот, Киев соопшти дека рускиот напредок во секторот е запрен и дека украинските трупи спроведуваат контранапади. Радакин кажа дека Русија „пропаѓа“ и покрај тековната офанзива во Харковската област и проблемите на украинските сили со недостигот на персонал и муниција.
„Русија прави тактички напредок на копно. Но, тогаш треба малку да се повлечете. Ако се вратите во март 2022 година, Русија зазеде околу 17 отсто од територијата на Украина. Денес има 11 отсто. Значи, Русија сè уште е во дефицит“, вели тој.
Одговарајќи на прашањето дали Украина ќе надвладее во оваа војна, Радакин рече дека е „многу уверен“.
„До крајот на јуни, Русија ќе изгуби 500.000 луѓе – убиени и ранети. Ние веќе поминавме 800 дена во војна која (Владимир) Путин очекуваше да биде долга три дена. Ова е тешко за Украина, но мораме да ја продолжиме нашата поддршка“, вели адмиралот.
Шефот на британската армија исто така, рече дека рускиот лидер не сака војна со НАТО или нуклеарна војна.
„Имаме огромна надмоќ поради силата на НАТО“, додаде Радакин.
Москва им се закани на САД со „последици“ поради, како што го нарече, „мешањето во рускиот систем за рано предупредување за ракети“, наводно предизвикано од неодамнешните украински напади, јави ДПА.
Руската инвазија на Украина почна на 24 февруари 2022 година.