ДЕЈВИД КАМЕРОН РАЗГОВАРАЛ СО ЛИЦЕ КОЕ СЕ ПРЕТСТАВИЛО КАКО ПОРОШЕНКО: Дали „падна“ во замка на руските пранкери?

Добивај вести на Viber

Шефот на дипломатијата на Британија, Дејвид Камерон разменил пораки, а имал и видео повик со лице кое се претставило како екс украинскиот претседател Петро Порошенко, но подоцна е утврдено дека тоа е измама.

Министерството објави детали за измамата. Во соопштението не е наведено за што се разговарало, но се вели дека личноста од другата страна на повикот побарала од Камерон туѓи информации за контакт.

Форин Офисот соопшти дека Камерон ги објавува овие информации „во случај видеото последователно да се манипулира“ и да се осигура „дека другите се свесни за овој ризик“. Не се знае кој стои зад измамата. Инаку, двајца руски пранкери Владимир Кузнецов (Вован) и Алексеј Столјаров (Лексус) со години измамуваат познати личности, политичари. На нивните измами наседнаа познати европски лидери. Тие од нив извлекоа информации за важни политички случувања. Италијанската премиерка Џорџа Мелони лани зборувала за меѓународниот замор од конфликтот во Украина и за недостатокот на поддршка за напорите на Италија да се справи со миграцијата во телефонски разговор со руски пранкери.

Во 2019, тогашниот премиер на Македонија, Зоран Заев соопшти дека и тој разговарал со руските пранкери Лексус и Вован, кои се претставиле како тогашниот украинскиот претседател Петро Порошенко и генералниот секретар на НАТО, Јенс Столтенберг.