Државјани на Македонија помагале косовци преку Драч да заминуваат за Италија
Објавено во: Македонија 08 Август, 2022
Албански медиум објави дека македонски државјани се „гарант” за косовски граѓани во обидите од Драч да заминат за Италија.
Ора њуз јави дека полицијата во Драч денеска информирала дека уапсила двајца жители на Скопје, откако се фатени од службите на граничната полиција како им помагаат на двајца државјани од Косово илегално да ја преминат границата. По завршувањето на дејствијата против четирите лица поведена е кривична постапка.
Во друг случај, полицијата денеска фатила 43-годишен маж од Скопје како со фалсификувани документи им помага на пет граѓани да ја преминат границата.
„Полицијата секојдневно информира за апсења на државјани од Косово или од Северна Македонија кои се обидуваат илегално да заминат или даваат „помош за илегално преминување на границата“, наведува телевизијата.
Појавата е зачестена од средината на минатиот месец кога е зголемена фреквенцијата на патници, иселеници и туристи. Само утрово преку пристаништето Драч влегле околу 4.300 лица, додека во неделата нивниот број се искачи на 10.000, главно иселеници од Албанија, како и од Северна Македонија и Косово, кои летните одмори ги минуваат во родниот крај.