Добивај вести на Viber
Европската комисија претстави нова стратегија за поддршка на крајбрежниот и поморскиот туризам во Европа.
Во секторот работат речиси 3,2 милиони лица, кои произведуваат бруто вредност од 183 милијарди евра за економијата на ЕУ. Тоа е повеќе од една третина од бруто производ на морската економија.
Во 2013 година во 28-те држави од ЕУ ноќевањата во хотелите се 2,6 милијарди, што е зголемување од 1,6% во однос на 2012 година. Речиси една третина од туристичката дејност на Европа е во крајбрежните области, а околу 51% од сместувачката база на хотелите е во области со морска граница.
Сепак крајбрежните области често страдаат од висока невработеност, вели еврокомесарот за морепловство и рибарство Марија Даманаки.
Се претпоставува дека секторот е попречуван од сезонскиот карактер на работата, нестабилна побарувачка, зголемената конкуренција во светот и тешкотии во пристапот до финансии.
Затоа предложената стратегија предвидува 14 активности на ЕУ, со цел да се помогне на крајбрежните региони и претпријатија да се справат со предизвиците со кои се соочуваат, се вели во соопштение на сајтот на ЕК.
Предложените активности вклучуваат креирање на јавно-приватни партнерства, стимулирање на екотуризмот и создавање на онлајн прирачник за можностите за финансирање, за да се помогне во привлекувањето на инвестиции, промовирање на иновации.
Комисијата предлага уште паневропски дијалог меѓу луксузните оператори, пристаништа и други заинтересирани страни, промотивни и комуникациски кампањи, промовирање на стратегии за намалување на отпадот во морските води.
Стратегијата ќе се спроведува од земјите членки, регионалните власти и индустријата, кон која е упатен повик да развие нови бизнис модели за секторот.
Една од целите е да се намали невработеноста, особено меѓу младите луѓе, исто така и да се создаде средина која привлекува инвестиции.
Оваа стратегија ќе биде земена расправа на конференција организирана од грчкото претседателство на заедницата, закажана за 10 март во Атина. Конкретни активности ќе се преземат во следните месеци.
К.К.