Германските бизнисмени загрижени од ефектот на санкциите против Русија

Добивај вести на Viber

Неколку германски водечки бизнисмени ги критикуваат европските и американските санкции против Русија за случувањата во Украина, пишува германскиот весник Ди Велт. Херберт Хајнер, извршниот директор на Адидас, смета дека Западот предолго го одлага отворениот разговор со рускиот претседател Владимир Путин. „Мора да се запрашате нели некој како Путин требаше да биде вклучен во процесот многу порано, пред да биде премногу доцна“. вели Хајнер. Германската компанија за спортска опрема Адидас има повеќе од 1.000 продавници во Русија, а акциите на Адидас од почетокот на годинава изгубија 15% од вредноста, делумно и заради кримската криза. Русија е 11-ти трговски партнер на Германија, со меѓусебна размена во вредност од 76,5 милијарди евра годишно. Многу компании се загрижени дека во случај на дополнителни санкции можат да го загубат рускиот пазар. Околу 300 илјади работни места во Германија директно зависат од бизнисот со Русија, а најмоќната европска економија покрива 35% од сопствените потреби за природен гас со увоз од Русија.