КАДЕ ИСПАРИ ДОБИВКАТА НА ГИГАНТОТ „МАКСТИЛ“? Еве зошто се намалила

Добивај вести на Viber

Добивката на „Макстил“ на крај на септември е 914.000 евра и во споредба со крајот на јуни е намалена за повеќе од 2 милиони евра. Падот е резултат на комбинација на три фактори: намалени приходи од продажба поради пониски цени на производите, исплатените пари за солидарен данок и зголемени финансиски расходи кои се резултат на кредитирањето без кое „Макстил“ не може да функционира. Но и покрај тоа што е соочен со пад на глобалните цени на производите, дополнителните давачки од данокот за солидарност и зголемените финансиски расходи менаџментот и акционерите на „Макстил“ се за пофалба затоа што во вакви тешки времиња водат сметка за своите вработени и трошоците за нив ги зголемиле за 17% од лани

Најголемата македонска челична индустрија имаше квартал со големи предизвици. Гледано од аспект на македонскиот национален економски интерес најважно е тоа што оваа компанија и понатаму е голем извозник.

Од почетокот на годинава па до крај на септември годинава „Макстил“ успеал да продаде свои производи во вредност од 102,5 милиони евра. Во споредба со истиот период лани продажбата е намалена за 23 отсто и тоа се должи на трендот на пад на цените на продуктите, според објаснувањето од компанијата.

Извозот е главна ставка и во вкупната продажба учествува доминантно односно со 92 милиони евра. Во споредба со истиот период лани извозот е намален за 24 отсто. Продажбата на домашен пазар за првите девет месеци е 10,5 милиони евра што е за 16 отсто послабо од истиот период лани.

Оперативните трошоци за првите девет месеци се 94,5 милиони евра. Бележат намалување од 27 отсто во однос на истиот период лани и го следат трендот на намалена продажба. Тоа значи дека производството на „Макстил“ е помало од лани и е прилагодено на побарувачката.

Најголеми ставки во оперативните трошоци се, очекувано, прво трошоците за набавка на суровини и други материјали. За нив компанијата издвоила 65,1 милиони евра што е за 38 отсто помалку од претходната година. Сепак и во вакви услови „Макстил“ не штедел на своите вработени. Трошоците за нив се зголемени за 17 отсто во однос на лани и на вработените се исплатени 12,6 милиони евра.

Оперативната добивка на компанијата на крај на септември е намалена за 82 отсто од претходната година. Изнесува 2,55 милиони евра. Главна причина за намалената добивка е исплатата на солидарниот данок за ланското работење.Во ставката Останати трошоци од работењето е книжен данокот на солидарност што таа ставка ја прави повисока за речиси 4 пати од лани. Причина е исплатата на 4,2 милиони евра за солидарен данок кој власта го наметна на компаниите како еднократна давачка.  

Дополнително на тоа добивката се намалила и заради зголемените финансиски расходи на „Макстил“ кои на крај на септември изнесуваат 2,1 милиони евра и во споредба со лани се зголемени за 23 отсто.

Единствена надеж дека не е се изгубено за акционерите на „Макстил“ е тоа што бизнис заедницата објави дека го обжалила овој закон пред Уставен суд и доколку биде поништен парите што ги платиле ќе им бидат вратени назад.