Кличко нема да се кандидира за претседател на Украина

Добивај вести на Viber

Поранешниот боксерски шампион Виталиј Кличко, еден од лидерите на украинската опозиција, нема да се кандидира за претседател на државата, иако тоа претходно го најави. Наместо тоа, на мајските претседателски избори во Украина, Кличко и неговата партија УДАР ќе го поддржат украинскиот олигарх Петро Порошенко, кој важи за фаворит во претседателската трка. „Единствена шанса за победа е да се номинира еден кандидат на демократските сили“,објаснува Кличко, кој беше еден од предводниците на протестите против разрешениот украински претседател Виктор Јанукович. Милијардерот Порошенко, 48-годишен бизнисмен и пратеник во украинскиот Парламент, се очекува денеска да ја објави својата кандидатура. Тој беше единствениот украински олигарх кој отворено ги поддржа прозападните протести во Киев. Неговото богатство магазинот Форбс го проценува на 1,6 милијарди долари, а империјата на Порошенко се движи од производство на чоколади и бонбони до споственост на медиуми. Сопственик е на кондиторската фирма „Рошен“, а Русија минатото лето забрани увоз на нејзините популарни чоколади. Тој беше министер за надворешни работи, а потоа и министер за економија, извесно време и во Владата на Јанукович, па затоа се смета како компромисно решение. Според една анкета чиј резултат е објавен неделава, тој е во водство со 24,9 проценти поддршка, далеку пред Витали Кличко (8,9 проценти) и поранешната премиерка Јулија Тимошенко (8,2 проценти).