Масовна акција за расчистување на критичните точки

Добивај вести на Viber

Членовите на ФБ-групата „Хуманитарна помош за поплавените места во Скопје“ ги повикуваат граѓаните  коишто се физички и здравствено подготвени, на заедничка ударна акција во сабота  за расчистување на теренот на сите критични точки.

„Увидот на теренот покажува дека само така, со организираност, координираност, масовност и голема екипираност ќе можеме да успееме да се расчисти теренот и да се спречат опасностите коишто можат да следат ако тоа не го сториме веднаш. Сега, таму сме најпотребни! Потребно е сите граѓани да започнат да доаѓаат на збирното место „Веро Центар“ („Веро Џамбо“) од 8 часот наутро, по што организирано и координирано ќе се упатуваат на критичните места“- се вели во повикот.

Увидот на теренот покажува дека потребниот број луѓе за расчистување на сите критични точки е многу поголем од оној којшто до местата може да се упати со јавниот превоз или индивидуалните возила.

„Затоа, јавно ги повикуваме сите приватни превозници и туристички агенции од Република Македонија, да се вклучат во оваа акција и сите свои автобуси, минибуси и комбиња, коишто не се користат за редовен превоз на 13 август 2016 година да ги упатат пред „Веро Центарот“ во Скопје (обезбеден паркинг) и да овозможат во текот на целиот ден да превезуваат граѓани до и од критичните точки, до локациите до коишто полицијата дозволува пристапност. Сигурни сме дека ќе ја покажат својата човечност и етичност и ќе ги испратат возилата коишто им се на располагање, бидејќи ниту еден друг ангажман и ниту еден друг личен приротет на приватните превозници, во овие денови, не треба да е поприротетен од помагањето во расчистување на сите критични точки“ - стои во повикот.

Сите приватни превозници коишто го прифаќаат јавниот повик, за повеќе информации и најава, како и сите поголеми групи на граѓани коишто го прифаќаат повикот за учество во оваа масовна и координирана акција, во секое време можат да се обратат на телефонскиот број: 076 456 345.

Сите граѓани коишто поседуваат соодветна опрема неопходно е да дојдат со неа, а за сите граѓани коишто немаат ваква опрема, соопштуваат дека поседуваат опрема којашто ќе им биде дадена пред упатување на терен.