MАЖОТ КОЈ ЈА НАПАДНА ДАНСКАТА ПРЕМИЕРКА Е СТРАНЕЦ: Бил пијан и дрогиран
Објавено во: Свет 08 Јуни, 2024
Maжот кој ја нападна данската премиерка Мете Фредериксен бил пијан и издрогиран и не се ни сеќава дека ја удрил.
Судот во Фредериксберг одлучи да му одреди притвор до 20 јуни на 39-годишниот маж кој синоќа ја нападна премиерката во центарот на Копенхаген, објавија данските медиуми. Напаѓачот е странски државјанин кој тврди дека нема врска со Данска, но работи во земјата во последните три месеци, а од 2023 година живее во изнајмено сместување во Бронби. Тој ниту зборува ниту разбира дански, но има дански матичен број, пишува локалниот медиум „Берлингске“.
Сепак, тврди дека знае која е Фредериксен и ја опишал како „многу добра премиерка“. Одлуката на судијата за притвор е донесена поради ризик дека обвинетиот би можел да избега од Данска. Сослушувањето на обвинетите и сведоците во случајот се одвива зад затворени врати поради големиот јавен интерес. По нападот, Фредериксен се пожалила на болки во вратот, поради што е пренесена во болница со полесна повреда од ударот.
foto EPA / JENS SCHLUETER