Мицкоски до Хан: Ништо не се случува од реформите во судството
Објавено во: Македонија 29 Јануари, 2018
Во рамките на посетата на делегацијата на ВМРО-ДПМНЕ во Брисел, лидерот на партијата Христијан Мицкоски оствари средба со еврокомесарот Јоханес Хан.
На средбата станало збор за интегрирањето на Република Македонија во рамките на Европската Унија.
„Говоревме за реформите и реформските процеси кои што би требале да се случат во Република Македонија но, за жал нивното случување заостанува. Сето тоа некако претставува една добро слово на хартија, а имплементацијата не можеме да ја почуствуваме и не се случува. Злоупотребата на моќта од страна на Владата предводена од СДСМ, лошите економски потези, лошите реформи во економијата, уназадувањето на економијата. Исто така гледаме дека ништо не се случува од аспект на реформите во судството и судскиот систем. Со еден збор кажано асолутно го понудивме сиот наш човечки и административен потенцијал како ВМРО-ДПМНЕ за да можеме да допринесеме и да дадеме вредност на она што се вели што е можна побрза интеграција на Република Македонија во рамките на Европската Унија. Секако станува збор и за долгогодишниот спор за името којшто го има нашата држава со соседна Република Грција.
Претседателот на ВМРО-ДПМНЕ со Хан разговарал и за лидерската средба која неодамна се одржа во поглед на усогласување на ставовите за преговорите за името со Грција под медијаторство на Нимиц.
„На самиот состанок како што рековме, за нас беше од информативен карактер, конечно дознавме за што станува збор. Го видовме предлогот кој што господинот Нимиц го има доставено до преговарачите, кој што повеќе или помалку и е познат на јавноста. Но исто така потенциравме дека остануваме на патеката за што е можно побрзо интегрирање на Република Македонија во Европската Унија и во НАТО“, истакна Мицкоски по средбата.