МИЦКОСКИ: Ако Преспaнскиот договор беше „ремек-дело“ на европската дипломатија, зошто не го повториме за вештачкиот спор со Бугарија

Добивај вести на Viber

Премиерот Христијан Мицкоски предложи да се примени формулата од Преспанскиот договор за одложено дејство и со уставните измени за вметнување на Бугарите во Уставот. 

Ова го кажа во неговиот говор на 20. Европски самит во Салцбург посветен на Европската Унија и реформите.

Тој додаде дека дури и да се внесат Бугарите во Уставот, никој не гарантира дека тоа ќе биде последен услов за исполнување на некоја обврска и дека за шест месеци од сега нема да се бара нешто дополнително.

„Ние како Влада сме посветени на изнаоѓање на решение и активен дијалог. Едно од решенијата секако е да се примени формулата веќе применета во Преспанскиот договор за одложено дејство, поточно во моментите кога ќе влеземе во Европската Унија, тогаш тие одлуки во Уставот да станат активни, што секако претставува заштитен механизам од подоцнежни условувања“, рече Мицкоски.

На крајот од говорот, Мицкоски кажа дека ако Преспанскиот договор беше ремек-дело, тогаш зошто не се реплицира и за решавање на спорот со Бугарија.

„Секогаш се обидувам да зборувам со одреден јазик што може да биде разбран северно од Виена. Ве молам, немој погрешно да ме разберете. Што значи дека ако Преспанскиот договор беше ремек-дело на европската дипломатија, нешто што е, да речеме, брилијантно, зошто тогаш не го повториме ова ремек-дело за изнаоѓање конечно решение, трајно, одржливо решение, што ќе обезбеди решение за овој вештачки спор“, кажа Мицкоски.

фото фејсбук/Христијан Мицкоски