МИЦКОСКИ ЗА АЛБАНСКАТА АКАДЕМИЈА НА НАУКИ: За таков буџет советниците од ВМРО-ДПМНЕ нема да гласаат
Објавено во: Македонија 16 Октомври, 2024
Премиерот Христијан Мицкоски вели дека во Македонија постои една Академија на науките и уметностите, а парите на граѓаните нема да се трошат на невладини организации.
Објасни дека како што слушнал во медиумите тоа е здружение на граѓани. Тој ја искоментира најавата на градоначалниците на Тетово, на Гостивар, на Чаир и на Желино, Биљал Касами, Валбон Лимани, Висар Ганиу и Блерим Сејдиу дека ќе даваат општински пари на Албанската академија на науки. Мицкоски вели дека таков буџет советниците од ВМРО-ДПМНЕ немаат намера ниту ќе гласаат.
„Ставот на ВМРО – ДПМНЕ во Владата и на академиците од другите еднички заедници е дека во Македонија постои една Академија на науките и уметностите. Не би сакал парите на граѓаните да се трошат за невладини организации повеќе би сакал да се трошат за нови училишта, градинки, булевари, паркови да креираме услови за младите кои ја напуштија нашата држава да се вратат назад. Тоа се темите за кои сакам да разговарам. За теми кои поларизираат или разделуваат не би сакал да зборувам“, изјави премиерот.
Тој додаде дека не очекува оваа тема да има негативно влијание врз коалициските односи во Владата.
Претседателот на СДСМ, Венко Филипче рече дека е против паралелна Академија на науките и уметностите. Инаку, и од МАНУ претходно укажаа дека во ниту една земја во регионот и пошироко нема две академии на науки.